Интервју со д-р Соња Чаловска од приватната градинка „СПИРИТ“: Да создаваме генерации со кои ќе се гордееме!

Во следното интервју, ќе дознаеме повеќе за развојот на програмата на приватната градинка „СПИРИТ“, нивниот флексибилен пристап кон дневниот распоред, важноста на соработката со родителите како семејство и клучните стратегии за успешна адаптација.

Разговаравме со Соња Чаловска, Доктор на педагошки науки и истакнат експерт со над две децении искуство во предучилишното образование. Д-р Чаловска е Основач и Управител на Приватната детска градинка „СПИРИТ“, со соодветна лиценца за директор и педагог. Таа исто така е и ко-основач на Асоцијацијата на приватни детски градинки „ПОЛЕТ“.

Со богато искуство како воспитувач и негувател, таа активно го применува истражувачкото знаење од својата докторатура за „Моделирање на пристапи кон учењето кај предучилишните деца“. Нејзината посветеност на квалитетот е видлива низ нејзините професионални ангажмани од Филозофскиот факултет, но и како автор/коавтор на бројни стручни публикации и дидактички материјали, што ја прави исклучително релевантен соговорник за иднината на раниот детски развој.

Колку долго постои вашата градинка и како се развивала Вашата програма низ годините? Која е Вашата визија за иднината?

Детска градинка „СПИРИТ“ е основана во 2012 година, дизајнирана и посветена на децата од предучилишна возраст.

Низ годините брендиравме уникатен модел на градинка, преку својот тематски и интегриран курикулум креиран за хетерогени групи. Стимулативната средина и нашиот модел се специјално дизајнирани да ги поттикнуваат критичкото, креативното и конструктивно мислење и делување кај децата од предучилишна возраст. 

Нашата визија е да го поттикнеме развојот на одредени вредности, знаења, карактеристики и пристапи кај децата кои ќе траат во текот на нивните подоцнежни години. Квалитети кои значително ќе влијаат и ќе придонесат за развојот на детскиот потенцијал.

Да создаваме генерации со кои ќе се гордееме.

Како е организиран дневниот распоред на децата, вклучувајќи ги времето за спиење, оброците и играта на отворено?

Дневниот распоред е дефиниран како во секоја градинка со одредено време за активности, едукација, игри и одмор. Сепак ние имаме флексибилна организација која ни овозможува да се прилагодиме на специфичните потреби на секое дете, притоа обезбедувајќи хармонично и ефективно искуство за социјализација и учење. 

Со инкорпорирање на интересни игри, активности за игра и во градинката и во природните средини, како и со заеднички проекти во кои се вклучени родителите и различни институции, истражуваме области и теми кои го привлекуваат интересот на децата.

Која е основната едукативна програма која ја следите и кои се најчестите дневни, неделни или месечни активности и работилници кои ги спроведувате за децата, со фокус на нивниот развој? 

Нашиот модел на програма се темели на Програмата за учење и развој, во кој се имплементирани позитивните елементи на светски познатите и применети педагошки модели, преку внимателно избрани теми кои се во фокусот на детскиот развој и интереси, што ни овозможува холистички да влијаме врз сите аспекти на развојот на децата.

Кои мерки ги преземате за одржување на безбедна и здрава средина, особено во текот на сезоните на настинки и грип?

Здравствената состојба на децата сметаме дека е одговорност на родителите. Доколку родителите ни донесат дете со влошена здравствена состојба, можно е тоа да влијае врз останатите деца. 

За среќа нашите родители се многу одговорни и до сега не сме се соочиле со ваков тип на проблем. Доколку детето е отсутно, тие секогаш уредно ни носат потврда од матичен лекар дека детето е здраво за да продолжи да посетува градинка или пак доколку е сомнителна здравствената состојба, превентивно го задржуваат дома. 

Оттука можам да заклучам дека имаме навистина безбедна и здрава средина по заслуга на нашите родители.

Како го избирате и обучувате вашиот воспитен кадар? Кои квалификации ги поседуваат и какви можности за континуиран професионален развој им обезбедувате?

Воспитно-згрижувачкиот кадар мора да поседува лиценца за работа со предучилишни деца. Ние внимателно го избираме кадарот бидејќи сметаме дека лиценцата не е мерило за добар учител. Добриот учител најпрво треба да има огромна љубов кон децата и тоа не се учи, туку едноставно се раѓаш таков. И на учителите им треба период на адаптација, но верувајте таа “обука” е доста интензивна и огромен предизвик. Сепак тој што сака да биде учител за кратко време станува успешен и омилен кај децата. Професионалното усовршување се одвива преку учество на научни конференции, семинари и стручни трибини од областа на педагогијата.

Каков е вашиот пристап кон комуникацијата и соработката со родителите? 

Комуникацијата со родителите ни е на највисоко ниво, тие не се наши “клиенти” тие се наши соработници и пријатели, ние сме како едно семејство. Имаме многу убаво дружење во и надвор од градинката, а на пролет планираме и да направиме еден заеднички викенд родители, деца и учители на камп.

Како изгледа процесот на адаптација за нови деца, особено за оние кои првпат доаѓаат во градинка? Кои стратегии ги користите за да обезбедите лесна интеграција и чувство на припадност?

Во процесот на адаптација најважно од се е родителот да има донесено стабилна одлука. Колку и да е мало детето, потребно е да му даде на знаење на детето дека оди во убава средина каде што ќе има многу игри и деца. Сепак, детето најпрво треба да ја има довербата кај родителот. 

Кај нас адаптацијата е доста лесна и трае околу една недела поради тоа што имаме хетерогени групи. Поголемите деца многу ни помагаат во прифаќањето на ново другарче и со оглед на позитивната атмосфера во градинката. Во тој период новите деца бараат многу љубов, гушкање и игра која ние безрезервно им ја даваме.

Приватна детска градинка „СПИРИТ“

📞072 304 037

✉ spiritmkd@gmail.com