Сѐ што треба да знаете за пелтечењето - совети од Логопедски кабинет "Зборче"

Мало двоумење пред да почне со зборување, повремено повторување на некој слог или наизглед не знае што сака да каже во моментот...

Дисфлуентностите и непотполно течниот говор се составен дел од детскиот развој, а и од говорот на возрасните. Но, во околности кога истите се позачестени и претставуваат предизвик во секојдневието на личноста, веќе се поставува прашањето дали станува збор за пелтечење и доколку е, што може да се преземе околу него?

Во овој блог ќе опфатиме како да се препознае пелтечењето, кои се опциите за третман и како да пристапиме кон дете или возрасен кој пелтечи. Првенствено, пелтечењето може да се дефинира како нарушување на нормалната флуентност и временската распределба на говорот, која е несоодветна за возраста на индивидуата.

Тоа може да има најразличен „изглед“, кој вклучува:

• повторување слогови на почетокот од зборот или повторување цели зборови (са-са-сакам);

• продолжување на почетниот глас во зборот (ммможе);

• „губење“ здив при изговор на некои зборови

• придружни неволеви движења на мускулите на лицето и телото;

• целосно заменување на попредизвикувачките зборови со „полесни“;

• одбегнување на некои говорни ситуации (говорење пред публика, пред непознати и сл.)

Во случај на појава на вакви и слични симптоми во период од 6 месеци, важно е да се направи логопедски преглед, каде логопедот ќе даде процена за говорно- јазичниот статус и препорака за понатамошен третман. Од исклучителна важност е и родителите соодветно да пристапат кон детето кое пелтечи.

Некои важни совети се:

• Секогаш ислушајте го детето кога говори и не го прекинувајте!

• Не велете му да забави со говорењето или да не пелтечи!

• Говорете му со малку побавно темпо од вообичаеното!

• Следете ги насоките од логопедот!

Се надевам дека овој блог ќе ве насочи и ќе ви помогне околу дилемите за едно од најчестите нарушувања на течноста на говорот.

За повеќе информации, контакт и совети, следете го логопедски кабинет „Зборче“ на Фејсбук и Инстаграм или исконтактирајте нѐ на 071 461 388.

Ваш логопед, Ивана