Јазик, идентитет, љубов: „Правопис за деца“ е повеќе од лекција

Јазикот отсекогаш бил мојата област; неговиот звук, неговата убавина и неговите правила на некој начин „го држат“ мојот свет. Сепак, „Правопис за деца“ не се роди ниту во училница ниту во канцеларија. На виделина излезе тогаш кога станав родител.

Сè дотогаш, верував дека ја разбирам својата љубов кон македонскиот јазик. Меѓутоа, кога се роди мојата ќерка Ника, таа љубов доби ново значење. Одеднаш, почнав да забележувам нешто што длабоко ме погодуваше: нашите деца растат опкружени со секакви содржини, но многу малку од нив ја негуваат нивната врска со мајчиниот јазик. Книги, видеа, активности – сите тие постоеја, но речиси ништо не им се обраќаше на децата на македонски, а особено не со квалитетот, креативноста и топлината што ги заслужуваат децата. Така, една мала идеја стана мисија!

Денес, „Правопис за деца“ создава содржина во неколку формати:

• интерактивни работилници што го прават учењето радосно,

• едукативни игри дизајнирани да изградат силни јазични темели,

• материјали за печатење за употреба дома и во училница,

• креативни предизвици што ги оживуваат правописот, граматиката и речникот.  

Сè е дизајнирано со една цел: да им помогнеме на децата да се заљубат во македонскиот јазик – не преку меморирање правила, туку преку искуство, игра, љубопитност и откривање.

А зошто го правам ова?

Затоа што јазикот е дел од нашиот идентитет, а ние како нација се соочуваме со големи идентитетски предизвици.

Затоа што секое дете заслужува да расте слушајќи го, читајќи го и зборувајќи го својот мајчин јазик.

Затоа што насмевките, прашањата и идеите на децата што доаѓаат на моите работилници ми ги разубавуваат деновите.

И затоа што мојата ќерка секое утро ме потсетува зошто е важно сето ова.

Мојата визија е едноставна: да создадам генерации што ќе го сакаат својот јазик, ќе ја разбираат неговата убавина и ќе се чувствуваат горди што го користат.

Мојата мисија е уште појасна: висококвалитетна образовна содржина од областа на македонскиот јазик достапна за секое дете; содржина што е модерна, креативна и вкоренета во нашето културно наследство.

Сакам „Правопис за деца“ да прерасне во простор каде што учењето на македонскиот јазик ќе биде магично искуство; место каде што родителите наоѓаат поддршка, наставниците наоѓаат инспирација, а децата наоѓаат радост; платформа на која мајчиниот јазик не е уште еден предмет на училиште, туку свет за истражување. А можеби најважно од сè, сакам да ја променам перцепцијата дека правописот и граматиката се „тешки“ или „здодевни“. Со вистинските алатки, јазичните правила стануваат универзум полн со приказни, тајни и креативност.

Иако сè започна со едно дете (моето), денес оваа иницијатива живее преку стотици мали гласови. Кога некој родител ќе ми каже дека неговото дете му го поправило изговорот или дека на училиште напишало нешто без ниту една грешка, тие моменти се мојата најголема награда и тоа е вистинската моќ на „Правопис за деца“: создаден е за децата, инспириран е од децата и континуирано се обликува од нив.

Ако и вие верувате во оваа мисија, благодарна сум ви за секој и најмал знак на поддршка.

Верувам дека заедно градиме нешто многу значајно!

Кристина Дукоска,

лектор и јазичен уредник,

основач на „Правопис за деца“