Место каде секое дете носи своја приказна

Во свет кој постојано нè брза да ги стигнеме одредниците, лесно е да го доживееме развојот како трка со времето. Секојдневно се будиме со истите прашања:

Дали прозборе навреме? Дали покажа со прст? Дали некаде доцниме?

Но, во Тимот А, развојот не се гледа како натпревар. Развојот го гледаме како процес кој бара време, трпение и многу љубов. Ова е место каде секое дете ја испишува својата приказна во свој, уникатен ритам, без споредување, без притисок, со поддршка што го следи неговиот индивидуален пат.

Зошто веруваме во овој пристап?

Затоа што притисокот ретко носи напредок. Тој создава несигурност и отпор. Кога на детето му се наметнуваат очекувања кои во моментот не може да ги исполни, неговиот систем се повлекува. Но, кога детето ќе почувствува дека е разбрано, прифатено и безбедно, тогаш се раѓа вистинската храброст за истражување, учење и поврзување. Напредокот овде не е секогаш гласен.

Во нашата работа, секојдневно гледаме дека најголемите промени не доаѓаат под притисок, туку низ доверба и игра. Тој напредок понекогаш е тивок, но неверојатно моќен: 

• подолг контакт со очи 

• првата искрена насмевка низ заедничка игра,

• моментот кога детето со доверба ни ја подава раката 

• или првиот храбар обид да ни каже или покаже нешто на свој начин.

Тоа се малите, но суштински важни чекори кои ги градат големите промени. Ние сме тука не за да го брзаме детето, туку да му бидеме сигурен сојузник додека ги открива своите потенцијали. Наместо да брзаме кон крајната цел, ајде да се осигураме дека детето има емоцијална стабилност — бидејќи само опуштено дете може навистина да учи.

За Тимот А, секој мал чекор е голем успех. Заедно со семејствата градиме пат кон поголема самостојност, самодоверба и подобар квалитет на живот за секое дете. Затоа што веруваме дека секое дете заслужува средина во која ќе може да расте, да учи и да го достигне својот потенцијал.

Пишува Маја Петровска, специјален едукатор и рехабилитатор во Тимот А